我都好心力交瘁
話說佢3中尾開始無那那又開始勁痾，一日五六次係等閒事
好下又壞下，到肚痾好D，又發燒，高燒不退......
到燒退左又肚痾.....呢2個月我真係就黎發癲...都曾經怨過..點解咁對我個仔
2歲人仔，要佢係咁痾，仲要痾到脫肛(即係直腸突出)........
原本已經好瘦O既，仲要瘦多2磅!!92CM高..得25磅!!!!!!!!!!!!!
最終搞到要睇小兒外科!!我地2公婆都好心力交瘁!!
好彩醫生唔建議做手術，要等佢肚痾好左先可以慢慢自己好返
所以我好狠心咁幫佢戒左奶...加埋食益生菌..最近已經有好轉....
午夜夢迴時，我都好痛恨自己點解無奶水......如果有奶水，我就可以比哥哥飲，唔駛等佢2歲就無奶飲....講起都好想喊><
不過最近發覺佢飲維他奶係無問題，所以而家一日都會比一包佢飲，遲下再好D，會試下鈣思寶
雖然佢身體差，但佢真係一個好乖好貼心O既小寶寶
話說我叔最鍾意話我仔瘦，有次同公公婆婆傾開計，我就話有邊個父母唔想自己仔女健健康康得架，有邊個唔想個仔肥肥白白....佢痾到咁....我可以點
講下講下 ...我終於都崩潰喊出黎......我仔一見我喊，即刻過黎攬住我叫媽媽
個下真係好窩心
亦都係個仔喪痾呢段期間...佢自己無那那戒左片，而家除左出街同訓覺會著片外，都唔駛再著片.......
我而家唯有希望係佢係返學前可以搞好脫肛問題....費時到時返學痾條腸出黎嚇親人
講完唔開心野，講下開心野
豬仔堯終於入到我都最心儀個間學校了!!呢間學校個面試真係好艱巨，長達45分鐘O既車輪式面試
，終於比佢通過左........希望佢會鍾意呢間學校啦~~!
又講下細佬，已經4個月大了......身長68CM，體重應該有18磅了
非常多野講，我估都係似哥哥語言發展快些
同埋似哥哥咁肢體發展緩慢....成4個月都仲唔係好識趴係抬頭同埋未識轉身
而且又係一個極之愛笑O既BB......好似比哥哥更加愛笑
只要比少少表情佢已經笑到咭咭聲
都係個句...乜都假...身體健康最緊要
好可憐呀, 睇到妳的形容我都眼濕濕... 不過依家搵到原因就好, 唔好怪自己啦, 希望好快無哂事, 肥仔返~~
回覆刪除btw 細佬真係好豬仔, 係咪好食得??
係呀，真係好可憐呀，而家食野都係以清淡為主，都係想儘量令腸胃恢復得快些
刪除我都打到好想喊呀><但而家一日一次屎已經KEEP左3星期，好令人振奮呀!!希望繼續好落去
細佬唔算好食得，但係就好吸收...呢樣應該係似我啦..HAHA...
吾好吾開心啦！希望豬仔快D好番呀！其實個原因係咩呢？ 對奶敏感？ 我地呢邊可以做D test睇下對邊樣食物敏感，不過吾知HK有無呢？ 不過睇落又吾似咁瘦喎....
回覆刪除我估係對奶敏感啦~
刪除香港都有得做，其實佢前兩星期已抽左血驗下有乜野缺乏，但就驗唔到食乜會敏感
但抽一次血佢好痛苦..我唔想佢抽多次血><
希望哥哥快d好番晒，唔駛你地咁擔心！
回覆刪除对奶敏感，但飲维他奶唔怕（那就好了），点解呢？
考到心儀幼稚園，恭喜恭喜！
我估係沖個D奶營養高難消化><
刪除多謝EE
慘慘豬呀！
回覆刪除仲要一人湊兩件，真係人都癲！
細佬堯都係高大B呀！O仔5個月大，都係70cm咋。你個件4個月就咁高喇！
係呀，真係人都癩....
刪除細佬叫舜呀..HEHE...68係我自己度O既，前2日去健康院度原來係69CM呀!
真係一個高大B~
哥哥真係仲瘦過小檬喎。。。不過唔怕，健康就得！細佬食埋哥哥果份
回覆刪除係呢~
刪除我都唔求佢肥仔了，只求佢健康就得~
其實係咩原因成日痾? 要做手術先得? 其實以前D人好細都唔食奶啦, 食其他野都一樣有營養, 你唔駛怪自己, 呢D野都唔係你控制度, BTW, 醫生話可以飲維他奶嗎? 好似好高糖份~~~~
回覆刪除痾唔駛做手術，而家無飲奶已經好好多啦
刪除脫肛就可以做，但唔做等佢自己好返更好~
唔理啦，自己沖個D奶粉仲甜啦~
陰公豬. 聽到都feel到你幾大壓力.
回覆刪除前排阿仔都枕住發燒同咳, 雖然佢唔洗食藥一兩日內都退到燒, 但我都心力交瘁...
可以想像到你個心幾唔安樂!
唔係一定要飲奶啫. 我有個朋友兩個仔都係7個月大開始完全唔飲奶 (佢信飲奶係唔健康既野). 瘦係瘦啲, 但一切發展都正常, 一樣咁精靈!
係呀，真係好大壓力，真係做乜都無心機，又係人前強顏歡笑...做人丫媽唔簡單呀~
刪除聽到你的例子令我舒服唔少，多謝你先~
陰功豬，聽到心都up埋，依家無哂事嘛？豬仔真係高左又瘦左，但其實肥瘦都唔緊要，最緊要健康！
回覆刪除小東，不要自責了！你已經好叻，唔好比太大壓力自己，繼續加油 ~
我家謙仔都係好瘦,3歲仔都係30磅查,佢又唔食野,唔緊要啦,最緊要身體健康就無問題啦!
回覆刪除真係要小心飲食先得呀~