豬仔二十個月大

脫BLOG脫得好緊要..無法...一黎大住個肚真係好攰，二黎學校野又忙到死....呢排又話教育局要特別視學，仲以為可以印印腳等於聖誕假同產假...點知又要勁大壓力.....好慘呀!!!!

講返個仔先，個仔已經20個月大啦

 而家已經唔再係bb啦，係一個小朋友啦，而且係一個人細鬼大o既小精靈
成日整蠱作怪....我諗最好玩就係呢個階段啦....
豬仔係一個愛笑o既寶寶...但就越大越痴人.....可能女仔會比較獨立d...不過佢都只不過係一個
歲半多dd o既小朋友....慢慢train啦..

講下佢既進度啦......
食野﹕
唔算好鍾意食野，但最近有新進展，就係終於肯咬下肉...食下肉...所以最近好似有 "輕"左少少
最鍾意食餅....可以一次過食好多餅...我見佢肯食飯，所以就肯比餅佢食.....
又會肯自己食飯..不過通常食到一半就放棄要大人餵返=.=

身高體重﹕
體重應該25-26磅啦..都係瘦瘦的...無法..之前病左幾個月...好難得先追返呢個重量..我已經好滿足....
身高....接近90cm...最近又見佢標高左.....比同齡小朋友高.....個個都以為佢已經2歲幾.......

說話﹕
講野就最叻.....已經學講句子好幾個月了...而家可以講7、8個字o既句子....雖然語法有時唔係咁
啱..但係我覺得已經好叻了....而家咬音都好準下......所以我有時都會粵、普、英三種語言三管齊下教佢.....但我發現佢係鍾意粵、英多過普=.=...無理由架...我陀住佢個時，日日都用普通話開咪教書架喎......
有時佢真係比到驚喜我架....有次我無那那講CAN U GIVE ME A GOODNIGHT KISS?
我以為佢唔識聽...點知佢真識錫埋黎......^^
而且我發現佢記性好好...好多野教一次就記得了....加油呀仔!!!!!!!

n班方面﹕
in左5間pn班，已經有4間offer.....除左一次佢發脾氣學校唔收外(但指令做到晒)
其它4間收晒...其中金巴倫迦南成3、4000人競爭都收左佢...我真係好開心，為佢驕傲
希望之後重點心儀o既學校都會有好表現啦><

 呢件桃紅色衫同波點衞衣係g market訂返黎架...我超鍾意...hahahaha

舜B@28WEEKS

原來不知不覺間已經陀左28週了，即已進入懷孕後期了
距離預產期3個月都無，希望呢2個幾月快快過去，BB健康足月出世
我成日覺得自己牛高馬大，點解我陀B陀得特別辛苦
上胎由6週嘔到32週
今胎由7週嘔到而家28週仲嘔緊.....唉，真係好痛苦
但上胎嘔4個月都已有好好胃口食野(不過邊食邊嘔啫)
今胎一到晚上就唔想食飯，只想食生果，真係對食野無乜興趣...尤其係飯，見到都想嘔
只能晚晚叫我媽煮面比我食......有時食左難消化O既野，仲會頂住個胃頂到上心口
成晚都會唔舒服....
上星期明明已經有幾時無嘔
今個星期朝飲奶同食包就會開始氣喘同頭暈，跟住就要大嘔特嘔先無事
bb呀bb...點解你唔比媽媽食野儲肥你呢？

正因為咁，10月中檢查時，醫生話舜b只排43.......
而我亦比上胎同時期重少左.....上胎28週已重左差不多20磅，而家28週就重左13.5磅......
人地話懷孕中期係蜜月期，究竟我幾時有蜜月期呀？？？
我d同事都仲好奇怪點解我成日唔舒服.........因為佢地陀的時候個個都無乜野..
所以生埋呢個死都唔會再生第3個啦..haha

其實自從有左b開始，我已開始驚緊生產時o既痛
有時會突然醒起下面爆時o既痛(我無剪，係自然爆)
有時又會諗起大痛o既痛(雖然我由開度數到生左只係用左1個鐘，所謂的大痛都只係痛左幾個字)，但都好有陰影...
希望今次又係陀得辛苦，但生得舒服啦.....如果今次可以半個鐘搞掂就好啦


呢張相係上星期27週時影o既.......吋數係36吋(今週無乜進展，依舊36吋)
但d未生過o既同事就極度誇張咁話﹕嘩...好大呀...真係好大呀...........
其實我無乜所謂..但係我真係覺得我個肚其實真係唔算大，只係上胎陀得較低，似肚腩多d
今胎陀得較高，個肚圓d望落先好似大d，吋數黎講，上胎呢個時候已38吋啦
再加埋我健o碩既身型.........36吋真係好細.......我見媽媽會個d好多都過40吋了
生過既又話我個肚太細...其實都幾煩.....肚大肚細有乜問題......BB健康咪得囉
搭地鐵只得一次一個叔叔讓比我之嘛

19個月雜記

請原諒大肚媽媽的懶隋...唯有打下月記啦..HAHAHA
豬仔又大一個月了，仲有唔到3個月，佢就榮升做哥哥啦..
希望溫馴的豬仔唔會呷細佬醋啦...
最近佢會主動走埋我個肚度，叫弟弟...然後SAY HI...再一野咀落黎
SO SWEET!!!!!!!!!

 最近豬仔哥哥好似白返DD喎...雖然手手腳腳都仲係好黑-.-

玩無可玩，成日拎爸爸心愛的模型車玩~~

我地終於去左政府的PLAYROOM玩啦，紅磡個PLAYROOM好細呀
不過小朋友都玩得好開心..呢日就同左細佢9日O既表弟玩啦
但其它大個的小朋友好粗魯，明明見到有BB係呢邊，仲特登推D野過黎想撞BB咁
 我表哥好柔咁叫佢地睇住，係無用架囉
呢個時侯我又老師上身，好惡咁叫佢地唔可以咁，明明見到有小朋友仲特登推野過黎撞!!!
之後佢地就彈左去另一邊度繼續大吼大叫咁玩，OK啦...唔關我事，唔好咁無家教特登撞我個仔就得!!!!佢地D父母完全唔理!!!!!

 2個小朋友一齊玩好開心....我仔做D乜，表弟就跟住做D乜..好搞笑

 爸爸訓係度，2個B又跟住訓係度，玩得不亦樂乎

 表哥去左遠處坐，表弟又忠心跟隨...HAHA

 10月14放假..我地居然好天真地以為一早仆入去迪士尼應該會無乜人...
SO NAIVE~!!!!!!
多人到嘔...我地真係好夠薑
呢隻衰豬，晨早又叫住話叫麥當勞，點知去左老麥又乜都唔食
搞到係迪士呢勁餓....
野食都未黎，佢已急不及待將無野O既匙放入口扮食野
最後玩左半日就走啦....

平日下午，豬仔午睡完，婆婆又會推佢去紅磡再去尖東，(婆婆想KEEP FIT)
而姨婆又會推表弟去一齊玩...佢地已經好習慣對方的存在
不過溫馴的豬仔成日都比表弟蝦><......成日搶佢玩具
仔呀仔呀...有時適當的強悍都係必須架~~~

豬仔18個月大了

我終於都捨得開返個BLOG了...HAHA...

原因只有一個﹕懶

見個個都搬黎呢度，我都湊個熱鬧啦...

我隻豬仔歲半了，呢個月佢O既發展真係好快

尤其係語言方面，佢而家識講O既野已經好多，人地話健康院會問佢地識幾多字，所以有晚無聊就同爸爸一齊數佢識O既字、詞(包括廣、英、普)，原來已經超過200字、詞了，而且記性超好，教過的字、動物，好快會記得而且識讀，EG﹕elephant、butterfly、 moon、sun、bear、triangle、square，仲有好多好多.......英文字母都認得23個，爭3個有時會唔記得.....數字已認得晒1-10，最近教緊佢11-20，希望好快會識啦........

而且佢仲好上心，有時發開口夢都係abcd同1234....搞到我都有d驚係咪迫得佢太緊？(但事實係佢自己成日拎d咭同書叫我地教...佢識就識，唔識都唔會鬧佢或迫佢)

希望佢第日好似我咁鍾意睇字、讀書啦..hahahaha

除左字詞外，佢仲開始會將詞語拼湊成句子，如問佢弟弟係邊？佢會答弟弟係度

身高體重方面﹕體重依然係停滯不前...因為前排痾同傷風成個月...><..仲係23-24磅到

身高都係...成個月無高到...都係87cm度...唔知幾時佢會再突然標高一大截呢？

就係佢18個月生日o既第二日，我地帶左佢去買玩具同食飯..隻豬仔好開心

黎到中秋節啦....因為歲半枝針我地延左期(病左)，延到9月19，我真係好後悔..因為呢晚係做節，丫仔打完呢枝針當晚好扭計...樂天唔怕生o既佢，呢日同大家族食飯...喊到收唔到聲，搞到我地都食唔到飯..要上到的士返到屋企佢先鎮定到..成晚攬住我..連爸爸婆婆都唔要...

唉...好彩後尾同佢去公園玩燈籠佢識開心返啫~

 

 好彩o既係...佢打呢枝針無發燒...只係怕左陌生人幾日咁多啫..同比較痴身幾日
中秋節第二日，由於爸爸要返工，我就同姨姨一齊湊佢...呢日就同佢去左放狗
豬仔係都要拎住丫b個袋...

 同丫b合照先..兩個b都好開心

 

仲摸摸丫b...豬仔真係錫丫b呀

 之後我就帶左佢去奧海城等爸爸收工啦.........
姨姨話想去h & m逛下...咁我地就去左行街...豬仔自己choose 褲同衫

 佢價值$249....(係媽媽心目中佢係無價寶黎o既..hehe)

原本打算食個飯再去cwb睇花燈..可惜豬仔的針後反應太勁...又扭計
剩係要我抱..但媽媽大住肚實在無可能抱咁耐..所以隨便係m記買少少野比佢食
就回家了